PREMIO de Investigación “ENRAIZADAS” 2026

ORGANIZAN E CONVOCAN: Asociación Euroeume | Museo Etnográfico da Capela

ÁREA TEMÁTICA: Investigación e divulgación da contribución histórica ao patrimonio cultural das mulleres na Comarca do Eume.

BASES REGULADORAS DO CONCURSO:

OBXECTO:

  1. O Premio de Investigación Enraizadas 2026, ten por obxecto fomentar a investigación, creación e difusión de estudos rigorosos e innovadores sobre a historia, cultura e as aportacións históricas das mulleres nos territorios que conforman a Comarca do Eume.

  2. Poderán participar cantas investigadoras e investigadores queiran cunha idade mínima de 16 anos de idade en adiante, de calquera nacionalidade, e de xeito individual ou colectivo, sempre que as obras sexan inéditas, estean redactadas en lingua galega, cunha linguaxe inclusiva e non sexista, e que non fosen premiadas noutros certames nin publicadas e difundidas na súa totalidade en ningún outro soporte. Cada persoa ou grupo de persoas poderán presentar un só traballo ou unha soa investigación.

  3. No que atinxe ás persoas participantes menores de idade, deberán incluír, xunto coas obras inéditas, a autorización expresa da persoa maior de idade ao seu cargo. O tratamento de datos persoais de menores está suxeito á normativa vixente de Protección de Datos, limitando a súa publicación se non se conta con dito consentimento, puidendo non optar ao premio. De igual xeito, o premio cobrarase a través da persoa representante legal das e dos participantes que sexan menores de idade.

  4. A extensión dos traballos atende a un mínimo de 10 páxinas númeradas correlativamente, incluíndo as notas, apéndices e ilustracións. O esquema de redacción deberá atender, en orde, a: título, índice, texto principal, bibliografía e anexos. A tipografía empregada deberá ser Arial, cun tamaño 12 da fonte. A redacción coidará que as marxes figuren a ámbos lados e cun espaciado de 1.5 puntos.

  5. Os traballos deberán ser enviados en orixinal e en formato PDF por correo certificado ao Museo Etnográfico de A Capela (O Pazo s/n, 15630, A Capela). No interior do sobre pechado, deberá figurar outro sobre pechado que conterá no seu interior o nome e os apelidos da(s) autora(s) ou autor(es) da obra, así como o seu enderezo e número de teléfono para posibilitar o contacto. Non se atenderá aos traballos enviados por correo electrónico.

PREMIO:

  1. Establécese un premio dotado cunha coantía única de 300 euros (suxeitos ás retencións vixentes do IRPF), á persoa investigadora ou grupo de persoas investigadoras que figuren como autoras e/ou autores da obra galardonada. Así como a publicación da obra premiada -en formato papel- na revista “O Retorno”, editada pola Asociación “Patronato do Museo etnográfico da Capela”.

  2. Outorgaráse un Diploma Oficial de Recoñecemento, emitido pola Asociación Euroeume, no marco do “Premio de Investigación Enraizadas 2026” á persoa ou grupo de persoas que consigan acadalo.

  3. O Xurado poderá conceder un accesit ou mención honorífica a proxectos de especial calidade ou orixinalidade para poder ser difundidos publicamente nas “XXI Xornadas Museísticas” organizadas polo “Patronato do Museo Etnográfico da Capela”.

TEMÁTICAS:

As temáticas poderán versar sobre calquera das seguintes liñas, ou combinación das mesmas, sempre e cando se desenvolvan arredor da figura da muller incidindo no ámbito da conservación do patrimonio cultural, inmaterial, natural e histórico:

  • Gastronomía e Soberanía Alimentaria: Receitas tradicionais, procesos culinarios, transformación de alimentos, reaproveitamento, cultivo, redes de intercambio, etc.

  • Romarías e Tradicións Populares: Participación das mulleres en troulas e eventos comunitarios, transmisión músical, baile, espazos simbólicos, etc.

  • Moda e Cultura Téxtil: Procesos de fiado (lá, liño, fibras tradicionais…), saberes colectivos sobre o oficio da costura e confeción textil, identidade cultural, indumentaria popular e tradicional, etc.

  • Memoria Colectiva e Revolucións: Cambios sociais promovidos polas mulleres, resistencias e transformacións que tiveron impacto social e non son recoñecidas oficialmente, historia social das mulleres do territorio, relatos orais, etc.

  • Participación Comunitaria e Liderazgo: Empoderamento das mulleres, ecofeminismo, análise de movementos feministas locais ou históricos, xustiza social, transformación de roles de xénero, igualdade de xénero, etc.

  • Rituais vencellados á Cultura Funeraria: Papel da muller na tradición asociada á morte, simboloxía, obxectos vencellados ao rito, continuidade interxeracional, coidados e preparacións do enterro, loitos, cohesión comunitaria, etc

  • Calquera temática que se basee na recoleción histórica de saberes e conservación patrimonial vencellada ás mulleres e a súa importancia a nivel social, laboral, político, comunitario, etc.

PRAZO DE PRESENTACIÓN:

O prazo de presentación remata o 13 de setembro de 2026.

A resolución do xurado darase a coñecer o 5 de outubro de 2026

XURADO E RESOLUCIÓN DO CONCURSO:

  1. As persoas que conforman o xurado, resolverán sobre todas as candidaturas presentadas, emitindo a súa decisión, que será inapelable e darase a coñecer a través da Secretaría da Asociación por vía telefónica. Igualmente, se decide outogar o accesit, a comunicación se dará de igual xeito.

  2. O premio poderá ser declarado deserto, se ao criterio das persoas do Xurado, as candidaturas recibidas non reúnen os méritos necesarios para facerse acredoras do galardón. De igual xeito, se a persoa ou persoas galardonadas renuncian ao Premio concedido, éste poderá ser adxudicado a outra candidatura.

  3. A participación nesta convocatoria implica a total aceptación das condicións das presentes bases.