O pasado día 16 de setembro, celebrouse, no Mercado Municipal de Pontedeume, a primeira das sesións de “Conversas Enraizadas”. A cita centrouse na Sobereanía Alimentaria desde a perspectiva do Ecofeminismo, contando como ponentes coa presenza de Conchi Docampo, do Sindicato Labrego, e con Nanda e Rebeca, da Cooperativa Vacalouras. Un total de 18 persoas participaron na xornada, que rematou cunha pequena degustación de produtos locais, comercializados por entidades locais como as propias Vacalouras, e a Asociación Agroalimentaria do Eume

Este ciclo de conversas enmárcase dentro do programa “Enraizadas”, da Asociación Euroeume, contando co financiamento das axudas de igualdade da Deputación da Coruña.

A seguinte cita deste ciclo de conversas celebrarase no Mosteiro de Monfero o vindeiro venres 23 de setembro, a partires das 18.00 horas. A temática desta conversa será a Custodia do Territorio, desde a perspectiva ecofeminista. Contaremos coa presenza de Cristina Pérez, xerente de Requeixo das Restrebas, e con Ana Cabana, profesora de historia do campus de Lugo da USC, que nos contarán a súa experiencia, tratando de contrastar as experiencias propias desde a perspectiva práctica, no caso de Cristina, e desde un marco teórico-práctico por parte de Ana Cabana. Agardámosvos!!!